Эронда Форобий илмий меросига бағишланган халқаро конференция бўлиб ўтади

26/02/2025    16:38    57

Ўзбекистондаги Ислом цивилизацияси марказида Эрон Ислом Республикасининг Ал-Мустафо университети Марказий Осиё бўйича вакили Али Пурманд Муҳсиний билан учрашув бўлиб ўтди. Мулоқот давомида икки давлат ўртасидаги илмий ҳамкорлик, қўлёзма манбаларни тадқиқ этиш ва халқаро анжуманларда иштирок этиш масалалари муҳокама қилинди.  

Ал-Мустафо университети Эрондаги энг йирик таълим муассасаларидан бири бўлиб, бу ерда 20 мингдан ортиқ талаба таҳсил олади. Университет кутубхоналарида Ўзбекистонга оид жуда кўп қўлёзмалар сақланиши маълум қилинди. Али Пурманд Муҳсиний ушбу манбаларни излаш ва тадқиқ этишда университет олимлари ҳамкорлик қилишга тайёр эканини таъкидлади.  

Учрашувда Ислом цивилизацияси маркази директори ўринбосари Эргаш Даминов Марказнинг илмий салоҳияти ва келгуси режалари ҳақида маълумот берди. Шунингдек, экспозицияларни бойитиш ва илмий тадқиқотларни ривожлантириш учун эронлик мутахассисларнинг кўмаги муҳим эканини қайд этди.  

Али Пурманд Муҳсиний ўзбекистонлик олимларни жорий йил ноябрь ойида Эронда ўтказиладиган Абу Наср Форобий илмий меросига бағишланган халқаро конференцияга таклиф қилди. Ушбу анжуманда дунёнинг ўнлаб мамлакатларидан олимлар ташриф буюриши кутилмоқда.  

Учрашув якунида Али Пурманд Муҳсиний Ислом цивилизацияси маркази биноси ва экспозициялари билан танишди. Шунингдек, унга "Ўзбекистон обидаларидаги битиклар" китоб-альбоми тақдим этилди.