Италиянинг “Магистер art” компанияси вакиллари Ўзбекистондаги Ислом цивилизацияси марказига ташриф буюрди

Кеча Ўзбекистондаги Ислом цивилизацияси маркази директори Фирдавс Абдухолиқов Италиянинг “Магистер art” компанияси вакиллари билан учрашув ўтказди.

Делегация дастлаб қурилиши давом этаётган Ўзбекистондаги Ислом цивилизацияси маркази биносини бориб кўрди. Меҳмонларга Ўзбекистон Республикаси Президенти Шавкат Мирзиёев ташаббуси билан бунёд этилаётган бино, унинг контентини янги мазмун билан бойитишда маҳаллий ва хорижий олимлар ҳамкорлигида амалга оширилаётган лойиҳалар ҳақида маълумот берилди. Делегация марказнинг кўргазмалар залидаги қадимий ва нодир экспонатларни катта қизиқиш билан томоша қилди. Абу Райҳон Беруний, Абу Али ибн Сино, Ал-Хоразмий, Мирзо Улуғбек каби машҳур олимларнинг дунё цивилизациясига қўшган ҳиссаси, уларнинг ноёб меросини ўрганиш ва оммалаштириш борасидаги ишлар билан танишди.

Шундан сўнг, делегация аъзолари Ўзбекистондаги Ислом цивилизацияси маркази томонидан нашр этилаётган китоб ва журналлар, ноёб артефактлар, шу билан бирга Ўзбекистон маданий меросини ўрганиш, сақлаш ва оммалаштириш бўйича Бутунжаҳон жамияти томонидан нашр этилган “Ўзбекистон маданий мероси жаҳон тўпламларида” китоб-альбомлари билан яқиндан танишди. Учрашув давомида томонлар ўртасида амалга оширилиши режалаштирилаётган ҳамкорлик лойиҳалари хусусида сўз борди.

Маълумот учун, “Магистер art” компанияси дунё бўйлаб маданият йўналишида йирик тадбирлар, халқаро кўргазмаларни ташкил этади. Шу билан бирга медиа маҳсулотлар ишлаб чиқариш билан ҳам шуғулланади.