Ислом маънавий меросига инновацион ёндашувлар: маданий мерос ҳафталиги доирасида Қуръон куни
Тадбирда 150 га яқин мутахассис иштирок этмоқда.
Бугун, 19 октябрь куни Ўзбекистондаги халқаро маданий мерос ҳафталиги "Шарқ Ренессанслари феномени: давлатлар, динлар, шахслар ва тамаддунлар" доирасида Ўзбекистон маданий меросини ўрганиш, сақлаш ва оммалаштириш бўйича Бутунжаҳон жамияти мажлислар залида "Ислом — тинчлик ва эзгулик дини" мавзусида халқаро илмий-маданий симпозиум ҳамда "Ўзбекистон ўрта аср Қуръонлари" ва "Имом Бухорий инновацион музейи" лойиҳаларининг тақдимоти бўлиб ўтмоқда.
"Ислом — тинчлик ва эзгулик дини" симпозиуми давомида Ўзбекистонда Президент Шавкат Мирзиёев ташаббуси билан исломий меросни ўрганиш, сақлаш ва оммалаштириш бўйича амалга оширилаётган ислоҳотлар, жумладан, "Ўзбекистонда Ислом цивилизацияси маркази" мега-лойиҳаси муҳокама қилинади.
Симпозиумдан сўнг тақдимот қисми бошланади, унда Ислом цивилизацияси маркази музейининг "Қуръонлар зали" ва Имом Бухорий инновацион музейи кўргазмаларини бойитишга қаратилган ғоялар тақдим этилди.
Тадбирда 150 га яқин мутахассис, жумладан, Туркиядан Турк қўлёзмалари ассоциацияси президенти Жошқун Йилмаз, БААдан "Манара" маркази ижрочи директори Бахита Аҳмед Ал-Румайтий, Франциядан Қуръоншунос, Сорбонна ва Париж Олий амалиёт мактаби доктори, Париж Академик тадқиқотлар институти раиси ва Миллий илмий тадқиқот маркази (CNRS) тадқиқотчиси Карим Ифрак, Ислом санъати музейи ва Мерос, маданият ва санъат масалалари бўйича Al Midad ташкилоти раҳбари Мамдуҳ Усмон, Австриядан Müller & Schindler нашриёти халқаро маркетинг ва бизнесни ривожлантириш бўйича вице-президенти Александр Вильгельм, Туркиядан Истанбул Ислом цивилизацияси сайлгоҳи раҳбари ва Истанбул Қуръони нусхалари муаллифи Ҳусайн Қутлу, Иорданиядан Ал-Байт университети шариат факультети юриспруденция профессори Аҳмад Ясин Абдел Раҳмон, Россиядан Давлат Эрмитажида қимматли ва археологик металлар илмий реставрация лабораторияси раҳбари, фан доктори Игорь Малкиель ва бошқа дунё миқёсидаги таниқли экспертлар иштирок этмоқда.
Олимлар томонидан тақдим этиладиган лойиҳалар қаторида жаҳондаги турли коллекцияларда сақланаётган Қуръонлар факсимил нусхаларини нашр этиш таклифлари илгари сурилмоқда. Шунингдек, хусусий коллекциялардаги қўлёзма Қуръонлар каталогини яратиш ва Ислом цивилизацияси марказида сақланаётган қўлёзмалар рўйхатини тузиш лойиҳалари ҳам тақдим этилмоқда.
Шунингдек, инновацион технологиялардан фойдаланиш режалаштирилган: илк мусҳафлар учун ягона платформа яратиш, Усмон мусҳафи ва Катта Лангар Қуръонининг рақамлаштирилган электрон версияларини яратиш ва сунъий интеллект ёрдамида Қуръон матнини тадқиқ қилиш орқали исломий маънавий меросга замонавий ёндашувларни топиш бўйича ғоялар муҳокама қилиняпти.
Бундан ташқари, хорижий экспертлар иштирокидаги илмий кенгашнинг кенгайтирилган йиғилиши ҳам ўтказилади, унда Президент Шавкат Мирзиёев топшириғига кўра қурилаётган Имом Бухорий инновацион музейи билан боғлиқ ғоялар муҳокама қилинмоқда.
Шу билан бирга, "Қуръон: тинчлик, эзгулик ва маънавий уйғониш ёғдуси" махсус касбий кўргазмаси ҳам ўтказилади. Ушбу кўргазмада экспертлар Ислом цивилизацияси маркази ва Имом Бухорий музейларига к турадиган экспонатлар билан танишиш имконига эга бўладилар.