Yaponiyadan tortib Luvr muzeyigacha ko‘plab eksponatlarning asl nusxasi olib kelinishi rejalashtirilmoqda

Oʻzbekistondagi Islom sivilizatsiyasi markazi kontentini boyitish maqsadida “Islomdan avvalgi davr” yoʻnalishi boʻyicha 100 dan ortiq muhim loyihalar muhokama qilindi. Unda Yaponiyadan tortib Luvr muzeyigacha koʻplab eksponatlarning asl nusxasini olib kelish rejalashtirilayotgani maʼlum qilindi. Loyiha doirasidagi ishchi guruhining navbatdagi muhokamasida tarixchilar, arxeologlar hamda sohaga aloqador mutaxassislar ishtirok etdi.

Mazkur boʻlim faoliyati orqali qadimiy sivilizatsiyalar, tarixiy yodgorliklar, arxeologik topilmalar, diniy eʼtiqodlar va madaniyat taraqqiyoti haqida boy maʼlumotlar keng jamoatchilikka taqdim etilishi koʻzda tutilgan. Ayniqsa, Oʻzbekiston hududida islomdan avval mavjud boʻlgan zardushtiylik va buddizm, mehnat madaniyati, shaharsozlik anʼanalari, ilk davlatchilik shakllari kabi muhim jihatlar innovatsion yondashuvlar asosida yoritilishi rejalashtirilgan.

Muhokamada tarix fanlari doktori, professor Mirsodiq Isxoqov bu yoʻnalishdagi izlanishlarning ilmiy va madaniy ahamiyati, shuningdek, yosh avlodni tarixiy merosga hurmat ruhida tarbiyalashdagi oʻrni haqida alohida toʻxtalib oʻtdi.

“Islomdan avvalgi davr sivilizatsiyalarini chuqur oʻrganish — bu bizning tarixiy xotiramizni tiklashdir. Har bir arxeologik topilma, har bir madaniy qatlam bizga ajdodlarimiz tafakkuri va dunyoqarashi haqida hikoya qiladi. Bu yoʻnalishdagi ilmiy izlanishlar xalqimiz madaniy merosini dunyoga tanitishda katta ahamiyatga ega.” – deydi Mirsodiq Isxoqov.

Islom sivilizatsiyasi markazi tashabbusi bilan amalga oshirilayotgan ushbu loyiha, shubhasiz, oʻzbek xalqi tarixi va madaniy merosini chuqur oʻrganishda muhim bosqichlardan biri boʻlib xizmat qiladi.