Islom sivilizatsiyasi markazi yoshlarga yangi dunyo ochmoqda

Prezident Shavkat Mirziyoyev tashabbusi bilan barpo etilgan Oʻzbekistondagi Islom sivilizatsiyasi markazi mamlakatimizdagi eng muhim ilmiy-maʼrifiy maskanlardan biri sifatida yosh tadqiqotchilar va olimlar uchun keng imkoniyatlar yaratmoqda. Markaz kelgusida doimiy maʼnaviyat maktabiga aylanishi kutilmoqda.

Bugungi kunda mazkur majmua oʻzbek xalqining ming yillik tarixiy-madaniy merosini jamlagan, islom ilm-fani, qadriyatlari va ilmiy taraqqiyot bosqichlarini zamonaviy texnologiyalar asosida namoyish etuvchi noyob ilmiy-madaniy markaz sifatida eʼtirof etilmoqda.

Bugun Markaz muzeyi ekspozitsiyalari boʻylab Oʻzbekiston xalqaro islomshunoslik akademiyasi magistrantlari uchun oʻquv-ekskursiya tashkil etildi.

Talabalar Markazning “Islomdan avvalgi davr”, “Birinchi Renessans”, “Ikkinchi Renessans” va “Yangi Oʻzbekiston – Yangi Renessans poydevori” boʻlimlarida taqdim etilgan ekspozitsiyalar bilan yaqindan tanishdilar.

Ekskursiya davomida tarix fanlari doktori, professor Davronbek Maqsudov Markazning tarixiy va maʼnaviy ahamiyati haqida yosh tadqiqotchilarga toʻxtalar ekan, shunday dedi:

– Davlatimiz rahbari tashabbusi bilan barpo etilgan Islom sivilizatsiyasi markazi bugunga kelib tarixiy-maʼrifiy majmuaga aylandi. Hazrati Imom majmuasi joylashgan qadimiy hududda barpo etilgan bu maskan oʻtmishning buyuk qatlamlarini va bugungi maʼnaviy hayotimizning mazmundorligini yaqqol namoyon etadi. Markaz yosh avlodning shakllanishiga taʼsir koʻrsatadigan ulkan maʼrifat oʻchogʻidir. Bu yerda tariximizning ulugʻvorligi, bugungi dinamika va kelajak istiqbollari mujassam”.

Professorning taʼkidlashicha, Markazda namoyish etilgan minglab eksponatlar mamlakatimiz ilmiy, maʼnaviy va madaniy merosining muhim tarkibiy qismini tashkil etib, tariximizning eng yorqin sahifalarini qayta jonlantiradi.

Tadbir yakunida magistrantlar Islom sivilizatsiyasi markazi faoliyatiga oid boy maʼlumot va taassurotlarga ega boʻlib, tarixga boʻlgan qiziqishlari yanada oshdi.