Tojikiston madaniyat vaziri Markaziy Osiyo maʼrifat tarixiga eʼtibor qaratdi

Joriy yilning 13 noyabridan boshlab poytaxtimizda Prezident Shavkat Mirziyoyev tashabbusi bilan oʻtkazilayotgan, Markaziy Osiyo va Ozarbayjonning 350 ga yaqin olimu ziyolilari, maʼrifatparvarlarini birlashtirgan “Markaziy Osiyo: umumiy maʼnaviy-maʼrifiy meros – umumiy kelajak" xalqaro kongressida  Tojikiston Respublikasi madaniyat vaziri Matlubaxon Amonzoda Sattoriyon madaniyat va maʼrifat milliy oʻzlikning yadrosi va tinchlik garovi, deya eʼtirof etdi.

Matlubaxon Amonzoda Sattoriyon, Tojikiston Respublikasi madaniyat vaziri:

– Markaziy Osiyo davlatlari rahbarlarining maslahat uchrashuvi arafasida oʻtkazilyotgan bu xalqaro kongressda beqiyos tashkiliy ishlar va mehmondoʻstlik uchun minnatdorlik bildirmoqchiman. Xalqlarimizni nafaqat umumiy geografiya, balki ming yillik madaniy aloqalar, doʻstona munosabatlar va bunyodkor hamkorliklar bogʻlab keladi. Markaziy Osiyo xalqlarining maʼnaviy merosi oddiygina qadimiy yodgorliklar, qoʻlyozmalar yoki sanʼat asarlari majmuasi emas. Bu – tarixning tirik nafasi, bizning oʻzligimiz asosi va ajdodlarimizga zamon sinovlaridan oʻtishga kuch bergan maʼnaviy qudratdir. Markaziy Osiyo qadimgi sivilizatsiyalarning muhim markazi sifatida Buyuk Ipak yoʻli orqali nafaqat savdo, balki Sharq va Gʻarb oʻrtasidagi madaniy koʻprik vazifasini bajargan. Bu yerda insonparvarlik, ilm-fan, bagʻrikenglik va oʻzaro taʼsirning buyuk gʻoyalari shakllangan.

 

Markaziy Osiyo tarixi – bu maʼrifat tarixi. Mamlakatingiz bir vaqtlar universitetlar, madrasalar, kutubxonalar markazi boʻlgan, ilmiy maktablar va ilmiy qarashlar shu yerda shakllangan. Abdurahmon Rudakiy, Abu Abdulloh Beruniy, Abu Ali ibn Sino, Nizomiy Ganjaviy, Abdurahmon Jomiy, Alisher Navoiy, Abay Qunanboy, Maxtumquli, Togʻay Moldo, Ahmad Donish kabi allomalar nomi butun bir maʼnaviy-maʼrifiy davrni ifodalaydi. Bu buyuk zotlar nafaqat xalqlarimizning, balki butun jahon sivilizatsiyasining faxridir. Madaniyat va maʼrifat milliy oʻzlikning yadrosi va tinchlik garovidir. Globallashuv sharoitida davlatlar oʻrtasidagi chegaralar tobora ochilib borayotgan bir paytda, aynan madaniyat va maʼnaviy mustaqillikni saqlashga yordam beradi, yosh avlodga oʻz tarixidan faxrlanish tuygʻusini yetkazadi. Bu markaz esa — madaniyat va ilm barqaror kelajakning asosi boʻladigan maskan boʻlishi kerak. Bugungi kunda davlatlarimiz faoliyatining eng ustuvor yoʻnalishlaridan biri mintaqa mamlakatlari va madaniyat sohalari oʻrtasidagi hamkorlikni mustahkamlashdir. Madaniyatning yaqinligi va umumiy anʼanalarimiz bizga noyob imkoniyatlar yaratadi – sanʼat, kino, muzey ishi va nomoddiy madaniy merosni asrash boʻyicha qoʻshma loyihalarni amalga oshirish imkonini beradi. Bugungi kongress ham ana shu maqsadlarning amaliy ifodasidir, deyish mumkin.