Temuriy shahzodaga tegishli tarixiy zirh yurtdoshlarimizga taqdim etiladi

    Oʻzbekistondagi Islom sivilizatsiyasi markazi ekspozitsiyasi Amir Temurning nabirasi va Sheroz hokimi Ibrohim Sulton uchun maxsus tayyorlangan zirhli kiyim nusxasi bilan boyishi kutilmoqda.

    XV asrda yasalgan ushbu asar hozirda Furusiyya Art Foundation kolleksiyasida saqlanmoqda. Old qismidagi oʻyma yozuv uning aynan Ibrohim Sulton buyurtmasi ekanini tasdiqlaydi.

    Ibrohim Sulton nafaqat davlat arbobi, balki sanʼat homiysi va noyob qoʻlyozmalar muallifi sifatida ham tarixda iz qoldirgan. U beshta Qurʼon qoʻlyozmasini shaxsan koʻchirgan va qurdirgan madrasalari uchun bezakli yozuvlar tayyorlagan. Zirhdagi damask uslubidagi oltin naqshlar uning qoʻlyozmalardagi bezaklari bilan uygʻunlik kasb etadi, bu esa asarning 1420–1430-yillarda yasalganidan dalolat beradi.

    Islom tarixida zirhlar avvaliga oddiy shaklda qoʻllanilgan boʻlsa, XV asrga kelib ular pocha va metall plastinkalar uygʻunlashgan murakkab koʻrinishda ishlab chiqila boshlandi. Ibrohim Sulton zirhi ana shunday uslubdagi eng qadimiy maʼlum namuna hisoblanadi. Har bir metall plastinka oʻsimlik va gul naqshlari bilan bezatilgan boʻlib, hokimning nufuzi va madaniy didini ifoda etadi.

    Bu noyob asar nafaqat harbiy tarixning guvohi, balki Temuriylar davridagi sanʼat va madaniy rivojlanishning yorqin namunasi sifatida ham ahamiyatlidir.