Usmon Mushafi raqamlashtiriladi: elektron nusxa va faksimile nashr yaratilmoqda

Oʻzbekistonda muqaddas islom manbalarini chuqur tadqiq etish, ularni asrash va keng jamoatchilikka yetkazish yoʻlida navbatdagi muhim ilmiy-loyiha amalga oshirilmoqda. Islom sivilizatsiyasi markazi tashabbusi bilan Toshkentda saqlanayotgan, dunyodagi eng qadimiy Qurʼon nusxalaridan biri — Usmon Mushafi ustida keng koʻlamli tadqiqotlar olib borilmoqda.

Ushbu loyihaning asosiy yoʻnalishlaridan biri — Usmon Mushafi va Katta Langar Qurʼonining matni, unda ishlatilgan siyoh, yozuv turlari va restavratsiyasi karbon tahlili asosida chuqur ilmiy tahlil qilinadi. Bu orqali Qurʼon nusxalarining tarixiy davri, yozilish uslubi va materiallari aniqlanadi.

Tadqiqotlar natijasida Usmon Mushafining elektron nusxasi yaratiladi. Bu elektron shakl markazning Qurʼoni karim zalida interaktiv monitorlar orqali taqdim etiladi — tashrif buyuruvchilar Mushaf sahifalarini virtual tarzda varaqlab koʻrish imkoniyatiga ega boʻladilar.

Shuningdek, Mushafning yuqori aniqlikdagi yangi faksimile nashri ham tayyorlanadi. Bu nashr original nusxaning shakl, rang va yozuvlarini toʻliq aks ettiradi, shuningdek, ilmiy-tarixiy izohlar bilan boyitiladi.

Ushbu loyiha Oʻzbekistondagi islomiy merosni keng targʻib etish, shuningdek, Islom sivilizatsiyasi ekspozitsiyasini yanada boyitish maqsadida amalga oshirilmoqda. Bu bilan nafaqat yurtimiz ahli, balki butun dunyo musulmonlari eng qadimiy Qurʼon nusxasi bilan yaqindan tanishish imkoniyatiga ega boʻladi.