Муҳаммад Жалуд: "Хоразмий замонавий технологияларнинг асосчиси"

Халқаро оғир атлетика федерацияси Президенти Муҳаммад Жалуд Президент Шавкат Мирзиеёв ташаббуси билан бунёд этилган Ўзбекистондаги Ислом цивилизацияси марказига ташриф буюрди. У “Ўзбекистон — муқаддас замин, улуғ халқ” дея эътироф этди.

Ўзбекистон спорт дипломатиясини ривожлантириш, халқаро ҳамкорликни кенгайтириш ва мамлакат нуфузини юксалтириш йўлидa изчил иш олиб бормоқда. Шу доирада Халқаро оғир атлетика федерацияси (IWF) Президенти Муҳаммад Жалуд айни пайтда юртимизда бўлиб турибди. 

Бугун Муҳаммад Жалуд мамлакатимизнинг муҳим маънавий-маърифий масканларидан бири – Президент Шавкат Мирзиеёв ташаббуси билан бунёд этилган Ўзбекистондаги Ислом цивилизацияси марказининг музей экспозициялари, ундаги контентлар, замонавий мультимедиа ечимлар, тарихий манбалар асосида яратилган интерактив бўлимлар, қадимий қўлёзмалар ва рақамлаштирилган манбалар билан танишди.  

Марказ бўйлаб саёҳатдан сўнг IWF Президенти ўз таассуротларини қуйидагича баён қилди:

“Икки йил аввал бу ерга қурилиш бошланганда келган эдим. Бугун эса ҳайратда қолдим — ҳаётимда бундай улкан ва мазмунли музейни кўрмаганман. Бу маскан инсонни минг йиллар олдинги даврларга олиб кетади. Сунъий интеллект асосидаги экспозициялар ва интерактив саҳналар ўтмишга ҳақиқий саёҳат ҳиссини беради.

 

Бу ер аждодларимизни ёдга оладиган муқаддас макон. Амир Темур, Хоразмий каби буюк зотлар фақат ўзбек халқи эмас, бутун инсоният учун беқиёс мерос қолдирган. Алгебранинг асосчиси — Хоразмий бўлмаса, бугунги технологиялар ҳам бўлмас эди. Шу боис мен учун Ўзбекистон — муқаддас замин, бу улуғ халқ”.

Муҳаммад Жалуд, шунингдек, бундай маскан учун Ўзбекистон халқига ва Президентга миннатдорлик билдирди.