Ислом цивилизацияси маркази БАА делегациясида катта таассурот қолдирди

Ўзбекистон Президенти Шавкат Мирзиёев ташаббуси билан барпо этилган Ислом цивилизацияси маркази ўзининг илмий-маърифий салоҳияти, замонавий технологиялар билан уйғунлаштирилган экспозициялари билан дунёнинг кўплаб нуфузли делегацияларини ўзига жалб этишда давом этмоқда.

Марказга Бирлашган Араб Амирликларининг йирик энергетика компанияси — “AMEA Power” бошқаруви раиси Ҳуссейн ал Новайс бошчилигидаги юқори даражадаги делегация ташриф буюрди. Ташриф давомида меҳмонлар Марказнинг архитектураси, ноёб экспонатлари ҳамда сунъий интеллект асосида тайёрланган интерактив кўргазмалар билан яқиндан танишдилар. 

Делегация аъзоларида айниқса Марказнинг сунъий интеллект, 3Д анимациялар, иммерсив кўргазмалар ва рақамли архив тизимлари асосида яратилган бўлимлари катта таассурот қолдирди.

Марказ бўйлаб экскурция чоғида Ҳуссейн ал Новайс ўз таассуротларини чуқур ҳаяжон ва юксак баҳо билан ифода этди:

“Мен бу улуғвор иншоотдан чинакамига ҳайратда қолдим. Бу ерда тарих оддий тарзда намойиш этилмайди — у жонланади. Марказда яратилган муҳит инсонни минг йилликлар қаърига қайтаради. Ушбу илмий-маърифий лойиҳани ҳаётга татбиқ этган барча мутахассисларга чуқур ҳурмат ва таҳсин билдираман — бу улкан меҳнат самараси. 

Бугун мен илк бор шуни англадимки, мен яхши билган, асарларини ўқиган кўплаб илм ва фалсафа намояндалари аслида Ўзбекистондан етишиб чиққан. Бу мен учун кутилмаган кашфиёт бўлди. 

Мен Ўзбекистон Президентини ушбу улкан ташаббус учун чин дилдан табриклайман. Марказ — нафақат Ўзбекистоннинг, балки бутун минтақанинг илмий-маърифий бойлигидир. Бу ерда амалга оширилган ишлар Ўзбекистоннинг қандай юксак ривожланиш босқичига чиққанини яққол кўрсатади,” дея таъкидлади Ҳуссейн ал Новайс.

Ушбу юксак баҳолар Марказнинг халқаро аҳамияти, илмий-потенциали ва маданий дипломатиядаги ролини яна бир бор намоён этди.

Марказ жаҳоннинг турли давлатларидан келаётган мутахассислар, дипломатлар ва илмий доиралар вакиллари учун ислом ва ўзбек цивилизациясининг ноёб меросини замонавий ёндашувда ўрганиш имконини бераётган энг муҳим масканлардан бири бўлиб бормоқда.