Бельгиялик олим: “Бой тарихингиз билан яқиндан танишиш мен учун катта шараф”

Ўзбекистондаги Ислом цивилизацияси маркази ҳали расман очилмаган бўлса-да, юртимизга ташриф буюраётган нуфузли меҳмонлар, халқаро тадбирлар қатнашчилари томонидан улкан ташаббус сифатида эътироф этилмоқда. 

Хусусан, Ўзбекистон Дерматология Ассоциацияси томонидан ташкил этилган халқаро конференция қатнашчилари ҳам Президент Шавкат Мирзиёев ташаббуси билан бунёд этилган, айни пайтда пардозлаш ва безак ишларининг якуний босқичи амалга оширилаётган жараёнлар билан танишиш учун ташриф буюришди. 

Халқаро конференция қатнашчиси, бельгиялик профессор Мила Балабанова Ислом цивилизацияси марказида айни пайтда амалга оширилаётган якуний босқич жараёнлари билан танишгач, таассуротлари ҳақида гапириб берди:

"Яқин ойларда очилиши кутилаётган бу Марказ бугунги кунда дунёдаги энг ҳайратланарли маданий мажмуалардан бири бўлиши шубҳасиз. Айниқса, Буюк Ипак йўли маданиятининг бутун инсоният тарихидаги ўрни бу ерда жуда чуқур очиб берилган", — дейди Мила Балабанова.

“Ўтган йили бу мажмуа ҳали қурилиш жараёнида эди ва мен уни бир кун албатта кўришни орзу қилгандим. Бугун эса пардозлаш ва безак ишлари ҳам якуний босқичда эканлигини кўриб гувоғ бўлдимки, Марказ мен кутганимдан ҳам гўзал, янада таъсирли бўлади. Бу ерда ҳар бир детал, безак ва экспонат катта меҳнат, билим ва меҳр билан яратилгани сезилади. Илмий жамоанинг фидокорона ишлари орқали тарих, маданият ва санъат уйғун бир бутунликда акс этган. Бой тарихингиз билан шу тарзда яқиндан танишиш мен учун катта шараф.”

Профессорнинг таъкидлашича, марказ нафақат ўтмишни эслатади, балки келажак авлодни ҳам илҳомлантиради.

“Бу маскан болалар таълими, халқ тарихи ва маданиятини кенг тарғиб этиш орқали инсоният тараққиётига хизмат қилади. Айниқса, Буюк Ипак йўли маданиятининг бутун инсоният тарихидаги ўрни бу ерда жуда чуқур очиб берилган. Бу жойда инсон ўзини руҳий жиҳатдан бойитади, маънавий юксалишни ҳис қилади,” — дейди у.

Мила Балабанова, шунингдек, Ўзбекистон халқининг меҳмондўстлиги, бой маданий мероси ва қадимий анъаналарини юксак эҳтиром билан тилга олди:
 

“Мен Ўзбекистоннинг маданий мероси, анъаналари, халқининг самимийлиги ва бу юртнинг бетакрор гўзаллигидан чин дилдан ҳайратдаман.”