Президентнинг БМТда илгари сурган ташаббуси қўллаб-қувватланди: Ислом цивилизацияси марказида экспозициялар янгиланмоқда

Президент Шавкат Мирзиёев БМТ Бош Ассамблеясининг 80-сессиясидаги тарихий нутқида яқин кунларда минтақа учун ноёб лойиҳа — Ислом цивилизацияси марказининг очилиши кутилаётганини таъкидлади. Давлат раҳбари, шунингдек, Ўзбекистонда бағрикенглик сиёсати, ислом маърифати ғояларини чуқур ўрганиш ва дунёга тарғиб қилиш борасида амалга оширилаётган ишлар ҳақида тўхталиб, “Буюк аждодларимиз – мутафаккир алломалар Имом Бухорий, Имом Термизий, Имом Мотуридийнинг бой маънавий ва илмий меросининг алоҳида тақдимоти Бирлашган Миллатлар Ташкилотида ўтказилади”, деб таъкидлаган эди.

Шу ташаббусдан келиб чиқиб, Ислом цивилизацияси марказида бўлиб ўтган навбатдаги Илмий кенгаш йиғилишида музей экспозицияси контентини такомиллаштириш масаласи муҳокама этилди.

Марказ директори Фирдавс Абдухолиқовнинг таъкидлашича, экспозициядаги энг ноёб экспонатлардан бири — Саудиядан олиб келинган муқаддас Каъбапўш (Кисва)га ташрифчиларнинг қизиқиши жуда катта. Шу боис экспозиция мазмунан уйғун бўлиши учун у ерга Президентимиз халқаро минбарда илгари сурган ташаббусга муносиб равишда аждодларимиз ҳақида алоҳида экспозицияларни ташкиллаштириш таклиф этилди.

Хусусан, Фирдавс Абдухолиқов Президент Мирзиёевнинг ташаббусларини қўллаб-қувватлаб, Биринчи Ренессанс экспозициясида Имом Бухорий, Имом Термизий ва Имом Мотуридийга алоҳида учта капсула ажратиш таклифини илгари сурди:

“Ҳар бир капсулада юртимиздаги диний-маърифий ислоҳотлар ва аждодлар мероси чуқур ёритилиши лозим”, — деди у.

Илмий кенгаш аъзолари ва олимлар бу таклифларни маъқуллади. Шунингдек, Имом Термизий ва Имом Мотуридий илмий тадқиқот марказлари вакиллари ҳам ҳамкорликда ишлашга тайёрликларини билдирди.

Эслатиб ўтамиз, “Биринчи Ренессанс даври” экспозицияси IX–XIII асрларни қамраб олиб, 7 та мавзули капсула асосида намойиш этилмоқда. Мазкур лойиҳалар дизайни устида эса Италиянинг Magister Art компанияси иш олиб бормоқда.