“Келажакда яна ташриф буюришни режалаштиряпман” – Абдулраҳман Албаннаа

Абдулраҳман Албаннаа, Бутунжаҳон ислом уюшмаси конференциялар ва тадбирлар вакили (Саудия Арабистони)
 

– Ростини айтсам, халқаро экспертлар форумида иштирок этганимдан жуда хурсанд бўлдим. Бу форум ислом цивилизацияси, музейшунослик ва тарих соҳаси бўйича кўплаб мутахассислар, тадқиқотчилар ва экспертларни бир жойга жамлади. Менимча, келгусида бундай учрашувларни мунтазам ўтказиш керак, шунда марказ учун фойдали тавсиялар ишлаб чиқилади.

 

Шунингдек, мен Ўзбекистондаги ислом цивилизацияси марказига ташриф буюрганимдан ҳам жуда мамнунман. Марказга Президент Шавкат Мирзиёев ва бутун Ўзбекистон давлати алоҳида эътибор қаратаётганини ҳис қилдим. Бу марказ фақат Ўзбекистон учун эмас, балки бутун дунё учун мўлжалланган. У бутун ислом цивилизацияси ва музейшунослик соҳаларида изланиш олиб бораётган мутахассислар учун ноёб илмий-маърифий марказ сифатида хизмат қилади.

 

Мен бу ерда кўрган экспозициялар — исломдан аввалги давр цивилизацияларидан тортиб, “Янги Ўзбекистон” даврига қадар бўлган тарихий босқичлар — мени жуда ҳайратга солди. Бу жойга келган ҳар бир меҳмон албатта марказни кўриб чиқиши керак, чунки бу ерда турли замонавий кўргазма воситалари ва ноёб тарихий экспонатлар мавжуд.

 

Мен бу ташрифдан жуда мамнун бўлдим ва, иншааллоҳ, келажакда яна ташриф буюришни режалаштиряпман.