Ҳеч ким кутмаган экспонат! 600 йил сақланган санъат мўъжизаси Ислом цивилизацияси маркази музейида намойиш этилади

🔴Темурийлар даврининг шаклланиши илк излари 

🔴 XIV–XV асрларга оид ноёб асар



    Марказий Осиё керамика меросининг дурдонаси – буғу тасвирланган анор шаклидаги кўза Ўзбекистонга келади.

    Ислом цивилизацияси марказида яқин кунларда намойиш этилиши кутилган навбатдаги бадиий экспонат – XIII–XIV асрларга оид, Илхонийлар даврига мансуб ноёб анор шаклидаги кўза музей ихлосмандларини кутмоқда.

    Баландлиги 25,2 см, кенглиги 18,1 см бўлган мазкур кўза нафақат ўзининг шакли билан, балки юзасидаги буғу тасвири ва гуллик орнаментлари билан ҳам эътиборни тортади. Унда Хитой чинни санъати таъсирини кўриш мумкин бўлиб, бу маданий алоқаларнинг ўша даврда қанчалик кенг қамровли бўлганини англатади.

    Ушбу экспонат XIV–XV асрларда кенг тарқалган Темурийлар оқ-кўк керамикасига хос услубларнинг илк намунаси сифатида ҳам баҳоланмоқда. Шу боис, у Темурийлар даври санъатининг шаклланиш жараёнини ўрганишда муҳим манба ҳисобланади.

    Қайд этиш керакки, Мовароуннаҳрнинг XIII–XIV асрларга оид бундай керамик буюмлари жуда кам сақланган. Ҳозирда Арон галереяси (Англия) коллекциясида сақланаётган ушбу ноёб кўза тез орада Ислом цивилизацияси марказидаги “Иккинчи Ренессанс” залида кенг жамоатчиликка тақдим этилади.