Контентни тўғри шакллантириш, тизимлаштириш ва ишлаб чиқаришга тайёрлаш жараёни қандай кетмоқда?

🔴Ўзбекистондаги Ислом цивилизацияси маркази экспозициясида глобал уйғунлик
 

🔴 Хориж тажрибаси билан замонавий тус олаётган маърифат макони


 

    Ўзбекистондаги Ислом цивилизацияси маркази музей экспозицияси учун контентлар махсус ишлаб чиқилган стандартлар ва методологик кўрсатмалар асосида тайёрланмоқда. Жумладан, экспонатлар жойлашуви, мультимедиа воситаларининг формати ва фойдаланувчи учун қулайликни таъминловчи визуал ечимларга алоҳида эътибор қаратилмоқда.

    Ўзбекистондаги Ислом цивилизацияси марказида бўлиб ўтган навбатдаги Кенгайтирилган Илмий кенгаш йиғилиши кун тартибида ана шу масала ҳам таҳлилий кўриб чиқилди. Унда Франциянинг “Avesto group” компанияси директори Аннабель Диот бошчилигидаги жамоа марказ экспозицияси дизайни бўйича олиб борилаётган ишлар ҳақида атрофлича ахборот берди.

    Йиғилишда таъкидланганидек, марказ доимий экспозициясини яратиш жараёнида турли соҳалар вакиллари — олимлар, илмий ходимлар, дизайнерлар ва мультимедиа мутахассисларидан иборат жамоалар ўз билим ва салоҳиятларини сафарбар этган ҳолда фаол ҳамкорликда иш олиб боришмоқда.

    Йиғилиш аввалида Марказ раҳбари, Илмий кенгаш раиси Фирдавс Абдухолиқов Президентимиз Шавкат Мирзиёев ташаббуси билан барпо этилаётган ушбу марказ очилиши учун тайёргарлик ишлари жадаллик билан давом этаётгани ва олдинда турган вазифаларга тўхталди.

– Ўзбекистон Республикаси Президенти Шавкат Мирзиёев ташаббуси билан барпо этилаётган Ўзбекистондаги Ислом цивилизацияси марказининг очилиш маросими учун олиб борилаётган ишлар жадал суръатда давом этмоқда. Олимлар, илмий кенгаш аъзолари, илмий ходимлар билан бир қаторда Франция, Италия, Туркия, Россия каби хорижнинг нуфузли компаниялари ҳам марказ дизайни устида туну кун ишлашяпти. Мақсад Марказ музейи экспозициясини Президентимиз томонидан қўйилган вазифаларга мос равишда бойитиш, ҳам илмий, ҳам замон нуқтаи назаридан барча аҳоли қатламлари учун маърифат масканига айлантириш, – деди Марказ раҳбари.

    Қайд этилишича, экспозиция ягона мазмун ва руҳда янграши учун унинг барча таркибий қисмларини уйғунлаштириш муҳим саналади. Шу нуқтаи назардан экспозиция контентини тўғри шакллантириш, тизимлаштириш ва ишлаб чиқаришга тайёрлаш юзасидан аниқ мезонлар ишлаб чиқилган.

    Доимий экспозициянинг асосини ташкил этувчи контент турларига экспонатлар, ёзма манбалар, мультимедиавий ва интерактив ечимлар ҳамда алоҳида аҳамиятга эга бўлган ноёб экспонатлар киради. Барча маълумотлар лотин алифбосидаги ўзбек ва инглиз тилларида тақдим этилиши белгиланган.

    Контентлар махсус ишлаб чиқилган стандартлар ва методологик кўрсатмалар асосида тайёрланмоқда. Жумладан, экспонатлар жойлашуви, мультимедиа воситаларининг формати ва фойдаланувчи учун қулайликни таъминловчи визуал ечимларга алоҳида эътибор қаратилмоқда.

    Илмий кенгаш аъзолари билан ҳамкорликда ёзма материаллар учун махсус шаблон ва услубий йўриқномалар ишлаб чиқилган бўлиб, ҳар бир босқичда текшириш ва таҳрир ишлари амалга оширилмоқда. Бу эса контентнинг аниқ, мақсадли ва таъсирчан чиқишига хизмат қилади.

    Бўлиб ўтган навбатдаги йиғилишда айни шу масалада музей экспозицияси бўлимлари координаторлари томонидан Франциянинг “Avesto group” компанияси вакилларига тақдим этилиши лозим бўлган маълумотлар таҳлили кўриб чиқилди. 

    Бу борада жараён бироз кечикаётгани, керакли маълумотлар белгиланган меъёрлар асосида ишлаб чиқилиши ва жойлаштирилиши учун тегишли матнлар ўз вақтида тақдим этилмаётгани таъкидланди. Шунингдек, мультимедиавий контентларни тизимлаштириш ва илмий маълумотлар билан уйғунлаштириш масаласида ҳам тезкорлик ошириш талаб қилинаётгани қайд этилди. 

    Марказ раҳбари бу масалада бўлимлар ишчи гуруҳ раҳбарлари ва координаторларига ушбу ҳолатни бартараф этиш бўйича қатъий топшириқ берди. Компания вакиллари эса агар маълумотлар ўз вақтида тақдим этилса, тез орада зиммасидаги вазифани тўлақонли якунига етказишини таъкидлади.

    Кенгаш йиғилишида шу каби 10 га яқин масала кўриб чиқилди ва ҳар бири бўйича кенгаш аъзолари қарори қабул қилинди.