Ислом ва тасаввуф тарихида чуқур из қолдирган аллома

   
    Ислом маънавий мероси, тасаввуф фалсафаси ва илм тараққиётида ўзгача мавқега эга бўлган буюк зотлар орасида Хожа Муҳаммад Порсо алоҳида ўрин тутади. У нафақат Нақшбандия тариқатининг етук арбоби, балки ўз даврининг йирик мутафаккири ва уламоси сифатида танилган.

    Хожа Муҳаммад Порсо — Бухорода туғилиб, Қуръон, ҳадис, калом каби исломий илмларни пухта ўрганган ва Хожа Баҳоуддин Нақшбанднинг энг суюкли шогирдларидан бири сифатида камол топган. У устозидан “Порсо” лақабини олган — бу сўз зоҳидлик, поклик ва тақволилик рамзи сифатида қабул қилинган.

    У зот Нақшбандия тариқатининг иккинчи халифаси сифатида узоқ йиллар иршод вазифасини бажарди, тасаввуф таълимотини кенг тарғиб этди ва диний-маърифий фаолиятда фаол иштирок этди. Унинг илмга бўлган меҳри шу даражада кучли эдики, биргина Шарқшунослик институтида Муҳаммад Порсога тегишли 20 дан ортиқ қўлёзма асар сақланади.

    У икки бор ҳаж сафари қилган. Охирги сафар чоғида касаллик туфайли Мадинада вафот этган ва Амир ул-мўъминин Аббос мақбараси ёнига дафн этилган.

    Унинг асарлари ислом оламида шариат ва тариқат ўртасидаги мувозанатни белгилашда, аҳли сунна вал-жамоа қарашларини асослашда муҳим манба сифатида ҳанузгача таҳлил этиб келинмоқда.

    Ислом цивилизацияси маркази томонидан амалга оширилаётган “Муҳаммад Порсо медиалойиҳаси" мазкур зотнинг бой маънавий меросини халқимизга танитиш, ёш авлод қалбида унга нисбатан эҳтиром уйғотиш ҳамда тасаввуф таълимотига асосланган маънавий тарбияни янада ривожлантиришга хизмат қилади.