Исломдан аввалги давр цивилизациялари: экспозиция учун янги экспонатлар танлаб олинди

    Ўзбекистондаги Ислом цивилизацияси маркази музейининг “Исломдан аввалги давр”  экспозицияси бўйича ишчи гуруҳ аъзолари ҳамда Туркиянинг мультимедиа технологиялари бўйича етакчи компанияларидан бири ҳисобланган “Outdoor Faсtory” мутахассислари иштирокида учрашув  бўлиб ўтди. 

    Учрашув давомида экспозицияни интерактив медиаконтентлар билан бойитиш, замонавий визуал технологиялар асосида такомиллаштириш ҳамда ҳудудий ва тарихий аниқликка эга янги экспонатларни танлаб олиш ишлари амалга оширилди.

    Муҳокамалар давомида Қадимги Бақтрия, Сўғд ва Ипак йўлига оид тарихий йўллар ҳамда уларнинг таркибий қисмларига тегишли ноёб артефактлар, муляжлар ва илмий асосланган намуналар танлаб олинди. Бу экспозиция мазмунини янада бойитиш, тарихий даврлар ўртасидаги узвийликни очиб бериш ва томошабинларда кенг тасаввур уйғотишга хизмат қилади.

    Шунингдек, туркиялик мутахассислар билан рақамлаштириш, аудиовизуал форматлар, АР/ВР (қўшилган ва виртуал реаллик) технологияларини экспозицияга жорий этиш бўйича амалий таклиф ва режалар муҳокама қилинди.

    Ишчи гуруҳ аъзолари ва “Outdoor Faсtory” жамоаси ўртасидаги ўзаро ҳамкорлик яқин келажакда юқори технологик ва маданий мероснинг замонавий намойишини таъминловчи янги экспозицион ечимларни яратишга замин яратди.