Марказда навбатдаги муҳокама: лойиҳалар ижросида яна бир қадам

    Ўзбекистондаги Ислом цивилизацияси марказида Илмий кенгаш аъзолари  музей экспозициясидан ўрин олган Биринчи Ренессанс даврига оид  лойиҳаларнинг амалий ижроси, жумладан, контентларнинг жойлашув дизайнини муҳокама қилишди.

    Ўзбекистондаги Ислом цивилизацияси марказида бўлиб ўтаётган навбатдаги илмий кенгаш йиғилишида Биринчи Ренессанс даври экспозициясининг биринчи тоифага киритилган лойиҳалар контентлари ҳамда уларнинг жойлашуви дизайни ҳақида атрофлича маълумот берилди. Биринчи Ренессанс даврига оид илмий кенгаш аъзолари ва олимлар томонидан контентлар тақдим қилиниб, Италиянинг Magister art компанияси томонидан уларнинг жойлашув дизайни ишлаб чиқилди. Хусусан, Биринчи Ренессанс даври экспозицияси 7 капсуладан иборат бўлиб, улар Мовароуннаҳрга ислом динининг кириб келиши, тарқалиши, фиқҳ, тариқат, илмига ҳисса қўшган алломалар, Бағдоддаги “Байт ул-ҳикма”да фаолият кўрсатган аждодларимиз ҳамда Хоразм Маъмун академиясига оид йўналишларда бўлади. Бундан ташқари экспозиция даврга оид бино макетлари, қўлёзма асарларнинг факсимиле нусхалари ҳамда инновацион медиа лойиҳалар билан янада бойитилади.

    Экспозиция учун яна бир янгилик шуки, Беҳзод Ҳожиметов томонидан Аҳмад Яссавий ҳамда Маҳмуд аз-Замахшарийга бағишлаб 2 та янги миниатюра чизилиб, илмий кенгаш муҳокамасига қўйилди. 

    Тақдимот сўнгида Хоразм Маъмун академияси раиси Икром Абдуллаев томонидан “Маъмун академияси” биносининг тахминий кўриниши бўйича иммерсив шоу яратилиши таклифи берилди. Кенгаш аъзолари бу таклифни амалга оширишга келишишди. 

    Шунингдек, Буюк Британиянинг “Sothby’s” ва “Christe’s” аукцион уйларидан қўлга киритилган юртимиз тарихига оид амалий санъат намуналари ҳамда артефактларнинг асосий қисми Биринчи Ренессанс даврига оид эканлиги очиқланди. Эндиликда музей экспозициясида ушбу артефактлар учун алоҳида жойлар ажратишга келишиб олинди.
 

Ислом цивилизацияси маркази Ахборот хизмати