“Вақт девори”да цивилизациялар 3D технология орқали намоён бўлади

    Ўзбекистондаги мегалойиҳа экспозициясидан жой оладиган “Вақт девори” исломдан аввалги даврлардан бошлаб темурийлар, бобурийлар сулолаларигача бўлган даврларни қамраб олади. Хронологик тартибда тузиладиган мазкур лойиҳадаги экспозициялар  замонавий миниатюра, 3D графика ва интерактив технологиялар орқали намоён этилади. Шу муносабат билан Ўзбекистондаги ислом цивилизацияси марказида “Исломдан аввалги давр” бўлими экспозициясини такомиллаштиришга бағишланган муҳокама йиғилиши ўтказилди. Унда Россиянинг “Планет 9” дизайн компанияси билан ҳамкорликда амалга оширилаётган ишлар атрофлича  таҳлил қилинди.

    Компания вакиллари Марказ томонидан тақдим этилган контентлар асосида экспозицияни тизимлаштириш, дизайн ва жойлаштириш бўйича ишлаб чиққан лойиҳани тақдим этдилар. Тақдимот давомида “Вақт девори”да акс эттирилиши режалаштирилган экспонатлардан фойдаланиш имкониятлари, шунингдек, қадимги хариталар масаласига ҳам алоҳида эътибор қаратилди. Турли манбалар, онлайн платформалар ва дастурлар асосида хариталар бўйича янги контентлар ишлаб чиқиш ҳамда экспозицияни янада бойитиш бўйича таклифлар илгари сурилди.  

    Ўз ИЦМ катта илмий ходими Обид Тангиров  таъкидлашича, дунёнинг йирик музейларидан тажрибали мутахассис жалб этилгани ва “Планет 9” дизайн компанияси билан олиб борилаётган ҳамкорлик ишларининг сифатли ва профессионал тарзда амалга оширилишига хизмат қилмоқда.

    Эслатиб ўтамиз, Марказ контентини мазмунан бой ва замонавий талабларга мос равишда шакллантириш мақсадида 2 000 дан ортиқ маҳаллий ва хорижий олимлар, мутахассислар ва экспертлар фаол иштирок этмоқда. Ҳозиргача 800 дан зиёд илмий ва инновацион лойиҳалар ишлаб чиқилган бўлиб, уларни амалга ошириш уч босқичда режалаштирилган.
 

Ислом цивилизацияси маркази Ахборот хизмати