“Маърифат карвони” лойиҳаси доирасида Самарқанд вилоятида кенг қамровли илмий-маърифий тадбирлар ўтказилмоқда

    Ўзбекистон Республикаси Президенти ташаббуси билан ташкил этилган “Маърифат карвони” лойиҳаси доирасида Самарқанд вилоятининг шаҳар ва туманларида бир қатор илмий-маърифий, маданий-маънавий тадбирлар юқори савияда ташкил этилмоқда.

    Жорий ҳафта давомида ушбу лойиҳа доирасида Самарқанд давлат университетида “Ижтимоий ғоялар” форуми ҳамда “Олимлар ва ёшлар” учрашуви бўлиб ўтди. Унда олий таълим муассасалари вакиллари, ёш тадқиқотчилар, магистрантлар, битирувчи талабалар ҳамда фаол ёшлар иштирок этди. Учрашувларда ёшлар ўз стартaп ғояларини тақдим этишди, соҳа мутахассислари томонидан илмий изланишларга оид тавсиялар берилди. Ёшлар ўзларини қизиқтирган саволларга батафсил жавоб олиш имкониятига эга бўлишди.

    Шунингдек, Самарқанд шаҳридаги ҳарбий қисмда “Тамаддун, маданият ва маърифат” мавзусидаги тарғибот тадбирлари доирасида “Тирик тарих” лойиҳаси амалга оширилди. Лойиҳа доирасида таниқли санъаткорлар ва халқ севган кино ижодкорлари билан ижодий учрашувлар ташкил этилди. Ҳарбийлар билан ўтказилган очиқ мулоқот форматдаги тадбир уларда катта таассурот қолдирди.

    “Маърифат карвони” тадбирлари Самарқанд вилоятининг туманларида ҳам фаол давом этмоқда. Оқдарё туманида жойлашган “Jeans Tekstile” МЧЖ корхонасида “Бир мақсад” лойиҳаси доирасида корхона ва ташкилот раҳбарлари, таълим муассасаларининг масъул ходимлари иштирокида семинар-тренинг ташкил этилди. Тадбирда ишчи-хизматчилар ҳам қатнашиб, ҳаётга бўлган муносабат ва мақсадларига нисбатан ижобий мотивация олдилар.

    Самарқанд давлат ветеринария медицинаси, чорвачилик ва биотехнологиялар университетида Ўзбекистонда барпо этилаётган Ислом цивилизацияси маркази мазмун-моҳиятига бағишланган семинар-тренинг ўтказилди. Унда марказнинг тарихий, маданий ва маърифий аҳамияти ҳақида батафсил маълумот берилди.

    Шунингдек, Самарқанд шаҳридаги Алишер Навоий истироҳат боғида тарғиботчилар ва ёшлар ўртасида ноанъанавий учрашув бўлиб ўтди. Унда ёшлар мамлакатимизда амалга оширилаётган ислоҳотлар ҳақида атрофлича маълумот олишди. Қатнашчиларга “Ёш китобхон” ва “Ёш китобхон оила” танловларида фаол иштирок этиш бўйича тавсиялар берилди.