“Маърифат карвони” Жиззах вилоятида: илм, маърифат ва маънавият сари қадам

    Ўзбекистондаги Ислом цивилизацияси маркази, Республика Маънавият ва маърифат маркази, "Маърифат" тарғиботчилар жамияти ва бошқа ҳамкор ташкилотлар ҳамкорлигида ўтказилаётган “Тамаддун, маданият ва маърифат” мавзусида ташкил этилган “Маърифат карвони” тарғибот гуруҳи Жиззах вилоятига етиб келди. Ушбу тадбирлар доирасида бир нечта ҳудудларда учрашувлар, маърифий суҳбатлар ва амалий лойиҳалар ўтказилди.

  Жиззах давлат педагогика университетида

    “Маърифат карвони” тарғиботчилари иштирокида “Янги Ўзбекистон – Янги Ренессанс пойдевори” мавзусида илмий-маърифий форум бўлиб ўтди. Унда янги давр тафаккури, маънавий уйғониш, ёшларнинг ижтимоий фаоллиги ва билимли авлод тарбияси ҳақида сўз юритилди. Талабалар билан жонли мулоқотлар, савол-жавоблар ташкил қилинди.

Ғаллаорол тумани, Узунбулоқ маҳалласи

    “Фаровон ҳаётга илк қадам” лойиҳаси доирасида семинар-тренинг ўтказилди. Унда маҳалла фаоллари, ёшлар ва аёллар билан ҳаётий кўникмалар, оилавий барқарорлик, касб-ҳунар ўрганиш, соғлом турмуш тарзи каби мавзуларда амалий машғулотлар ташкил этилди.

Шароф Рашидов тумани, Олмачи маҳалласи ҳарбий гарнизони

    “Тирик тарих” лойиҳаси асосида “Кинокарвон” ташаббуси амалга оширилди. Ҳарбий хизматчилар ва уларнинг оила аъзолари учун ватанпарварлик руҳини кучайтирувчи фильмлар намойиш этилди. Тадбир давомида тарихий хотира, жасорат ва фидойилик ҳақида маърузалар тингланди.

    “Маърифат карвони” ташаббуси вилоятдаги турли қатлам вакиллари билан юзма-юз учрашувлар орқали янги Ўзбекистон маънавиятини мустаҳкамлашга хизмат қилмоқда.